الوقت من دهب

الوقت من دهب

مساء الخير ..

الوقت من دهب بس ده يعتمد على الوقت ده انت حتقضيه ازاى ! .. فى اوقات من كتر ما هى مملة بتحس ان عقارب الساعة بتقلب سلحفاة اوقات تخلى الخمس دقايق تعدى فى خمس شهور .. وفى اوقات من كتر ما هى حلوة بتجرى ولا اجدعها عداءة .. تخلى الخمس شهور دقيقة واحدة. عمرى ما فهمت النظرية دى !

انا بالنسبة لى السنة الكاملة اللى بتعدى عليا مش السنة اللى بتتحسب بالوقت والشهور .. السنة اللى بتعدى عليا بتكون على حسب الحاجات اللى عملتها فى وقت معين .. يعنى مش لازم السنة بتاعتى تكون بنفس حساب السنة الميلادية او الهجرية .. زى ما تقولوا ليا تقويم خاص بيا .. يعنى من سنة ونص تكون سنة .. وممكن شهرين يكونوا سنة .. علشان كده انا بعتبر نفسى عشت سنين كتير اوى !

مش عارف اوصف الكلام الجاى ده ازاى .. بس انا خلصت سنة .. سنة حلوة بكل ما فيها ، عرفت ناس حلوة .. عرفت مدرسين حلوين .. وجربت حاجات احلى .. واكيد انا شخصياً اتغيرت ! ... مقدرش طبعاً اقول للاحسن .. دى حاجة ترجع للناس اللى بتعاملنى .. والاهم من كده .. مبقتش اخاف ! ممكن كنت بخاف جامد فى بداية السنة .. بس دلوقتى تيقنت ان الواحد بيعمل اللى عليه والباقى على ربنا .. المكتوب مكتوب .. بس احنا ناخد بالاسباب .. دى مش حالة يأس .. بس بطمّن نفسى.

فى اسطورة بحب احكيها لنفسى .. الاسطورة بتقول "الاعضاء اللى فى الجسم الإنسانى كانت لوحدها قبل ما تقرر تتجمع فى جسم واحد .. كان دائماً الاعضاء دى بتمشى لوحدها فى حديقة ما فى الجنوب .. العين والعقل كان دائماً بينهم مشاكل .. العين كانت بتحكم على الكائن اللى قدامه من مظهره .. العقل مكنش بيرضى بكده .. كان دائماً ينصحها ان كده غلط .. والكائن مبيتحكمش عليه من شكله ولازم نتحط معاه فى تجربة تثبت اذا كان كويس او وحش .. العين اخدت كلامه بإستهزاء .. وكانت حتحصل حرب كبيرة بين الاعضاء دى .. بس فى النهاية جنحوا الى السلم .. وكنوع من إظهار السلام ده اتفقوا انهم يتجمعوا مع بعض فى الجسم البشرى .. بس الحرب بدأت بعدها .. بس حرب باردة .. ولم تنتهى حتى الأن .. ومازلنا نحن نعانى !"

اللى عايز اقوله العين خداعة .. والقلب خواف  .. اما تبص من بعيد على حاجة ممكن تحسها رائعة .. معمولة من دهب .. بس اما تتحط فيها تلقيها قشرة .. مجرد قشرة من برا .. وفى حاجات تبان زى الكلب الوِلف –بالكسرة- واما تتحط فيها تلقيها اليفة حلوة... زى ما قلت فوق .. الموضوع ملوش قانون .. بس هى حسب الشخص .. متحكمش على حاجة من برا .. لا الوقت اللى حتقضيه ولا الشخص من مظهره ولا عن حاجة سمعتها ولا اى حاجة .. الحكم بالمظاهر وحش .. وانك تصدق كلام على حاجة من غير متعرفها اوحش.

الرهبة موجودة .. متخليهاش تسيطر على حياتك ... الوقت موجود .. ما تضيعوش خايف .. ومتتخدعش بالمظاهر .. وخليك فاكر ان الوقت من دهب .. الوقت سيف من دهب .. ان لم تقطعه .. بيعه ودوّر على سيف من دهب جديد.

                              مصطفى الشابي