فن البص !
بصراحة الواحد بقى بيخاف ينزل الشارع ، يركب
مواصلات ، يختلط بالناس .. الحياة بقت عُبارة عن فيلم رعب مابينتهيش .. بس تعالوا
نبص على نص الكباية المليان .. ايه ده ؟!؟! ثانية واحدة .. مفيش كباية اصلاً ؟؟
الكباية أتسرقت .
انا عن نفسى بخاف وانا نازل .. مش حكدب واقول
انى شجاع ومش بخاف .. انا بخاف .. بس الرهبة اللى بتبقى عندى وانا نازل لوحدى
تختلف عن وانا نازل مع أختى مثلاً .. ببقى ماشى بتلفت حوالييه فما بالك بقى اما
تنزل لوحدها .. تخيل كده معايا يا أستاذ .. تخيلى يا أنسة .. واحدة ماشية و كل خلق
الله بيبصوا عليها وهى مرعوبة من كل واحد بيبص بس بتحاول تعمل نفسها عبيطة ؟؟ تخيل
مدى الخوف من واحد ماشى وسط الشلة بتاعته وبيتكلم بعلو صوته وبيقبح وجايين عليها
؟؟
عايزك تتخيل بقى انك انت البنت .. و جاى عليك
شوية ناس شكلهم مايريحش .. قولى رد فعلك .. افتكر انت بنت .. الكام عضلة اللى انت
فرحان بيهم مش موجودين .. انت بنت !!
أحب اقول لكل واحد بيبص على الستات .. يا
فندم فى حاجة اسمها فن البص .. ده بيتلخص فى ايه بقى .. أقولك .. فى فرق من انك
تبص لواحد بأدب و بالبصة تحسسها بجمالها وكأنك بتبعتلها بوكيه ورد جميل .. وفى بصة
شهوانية بتخوف الست وتقرفها وتحسسها انك مجرد كلب سعران .. وفى بقى النوع الاخير
.. اللى مش بيبص وده مش موجود على اى كوكب فى المجرة .
لو عايز تبص بص بأدب او ماتبصش خالص .. و
متتحججش وتقول لبسها .. ربنا قال غض البصر .. وافتكر كده .. طالما انت بتدعى انك
راجل وانك اقوى من الست يبقى المفروض تبقى قوى فى انك تتحكم فى شهواتك ولو مش قادر
بقى ، يبقى تقعد فى زريبة .. تقعد مع نفس الصنف بتاعك .. بهااايم.
مصطفى زكريا الشابي
ليست هناك تعليقات:
إرسال تعليق