أبدأ بـنفســـك
كلنا بنشتكى من الفوضى والفساد ، بس ناسيين
اننا السبب فى ده ! بدليل اما بتروح تقول لحد على حاجة غلط بيعملها بيقولك
"طب ما الناس كلها بتعمل كده جت عليا ؟" أحب أقولك آه .. جت عليك.
الغلط عمره ما بيتبرر لو الناس كلها بتعمله
والصح عمره ما بيتحرم ولو واحد بس اللى بيعمله.
المشكلة تتلخص فى سلبية الكائن اللى بيُسمى
بالمواطن ، يعنى مثلاً الشخص اللى بيرمى الزبالة فى حتة كلها زبالة .. انت مرمتهاش
علشان الزبالة متجمعه هنا ، لا انت رميتها عشان لقيت الحاجة اللى حتبرر فعلتك ،
مجرد رمى الزبالة فى المكان الغير مخصص لها يعتبر جريمة وده بيحصل عشان حضرته مكسل
يفضل ماسك الكيس او الورقة فى ايده لحد اما يلاقى صندوق زبالة !
عارف ان كل واحد حيجى يقولى ان الحكومة
والنهضة ومش ذنبنا .. أحب أقول للناس دى "عندكم حق !"بس ما أعتقدش اننا
محتاجين حد يقولنا ننهض ازاى .. الحاجات اللى زى دى مش محتاجة مشروع نهضة ،
الحاجات اللى زى دى محتاجة نكون بنى آدميين !
الكلام اللى فوق ده ينطبق على حاجات كتير زى
الرشاوى والوسايط وكل اوجه الفساد بشكل عام ، الحكومة بالتأكيد عليها عامل كبير فى
الفساد اللى موجود بس متنساش .. انت كمان مشترك معاهم فى الفساد ده وعمرنا ما
حنتقدم ولا نشوف نهضة الا اذا بدأت بنفسك.
عشان كده
أبدأ بـــــفـــســــك !
مصطفى زكريا
الشابي
ليست هناك تعليقات:
إرسال تعليق