الكوميديا الحزينة
مفيش شخصيات زى دى ... انا أخترعت كل ده اما
النور قطع عليا وانا بستحمى ! ، ربنا ما يكتبها على حد !
******************
يوم نتيجة الأنتخابات !
قاعد انا وماما فى البيت بنتفرج على
التليفزيون على فيلم العار ومبسطوين واخر روقان ، وفى الفاصل راحت قالبه القناة
وجابت الأخبار وسمعت المذيع بيقول "لقد أجتاحت النهضة البلاد" راحت سأله
بابا وقالت له "ايه النهضة دى يا خويا ؟؟ دى غير التايفود ؟!" رد عليا
قالها "ده فيروس جديد جاى لينا من اللى لسه راجعين من الحج .. انتى عارفة بقى
بيتعدوا من الأسيوين والقطريين وعدوة الحج وحشة !" ردت عليه "ربنا يستر
ويبعدها عنا .. المهم .. رجع الفيلم بقى عايزة اعرف هيفيشوا الهوامش ازاى !"
بعدها بخمس شهور
قاعدين مشغلين التكييف وبنتفرج على فيلم
الكيف وفجأة النور قطع وطبعاً مش حنقضيها صمت .. قاعدنا نتكلم مع بعض .. كلام
عائلى
ماما راحت قايله "جاتها ستين نيلة اللى
عايزة نهضة .. مش حنعرف نكمل الفيلم" ، بابا راح رادد عليها "ما الراجل
الدكتور قالك اقفلوا التكييف .. كان لازم يعنى تولعيه دلوقتى أهو النور قطع
!" ، أنا بقى أتحمقت .. رحت رادد عليه "يا حج .. انت مالك محموق كده ليه
؟؟ وبعدين لو التكييف مش بياثر فى الكهرباء أدينا بنشغله ولو بيأثر أدى النور
بيقطع" راح رادد عليا "طيب يا خويا يا بتاع الفلسفة ... بس انت لابس
البيجامة كلها ليه ؟؟ مش قالوا لازم تقعد بالفنلة والبتاع؟" ، طبعاً الحج
أحرجنى بعد الكلمتين دول .. فأتضريت انى أقلع .. وأهو بردو .. أقلع انا بنفسى أحسن
ما حد يجى يقلعنى بالعافية !
بعدها بتلت شهور مكناش بنتفرج على حاجة عشان
النور كان لسه مقطوع !
بعدها بشهرين النور جه الحمدلله .. وبنفتح
الدِش من هنا ولقينا كل القنوات اللى كنا بنحبها أتقفلت .. الفراعين ، التت ، دريم
، المحور .. وطلع عندنا قنوات جديدة الحافظ ، مصر 25 ، الحافظ تانى .. بس كانت لسه
فيها روح الكوميديا اللى كانت فى القنوات اللى اتقفلت ، كنا بنتشقلب ضحك منها ، بس
ماما وبابا كانوا مضايقين شوية عشان مش حيعرفوا يشوفوا أخبار البلد الصح !
المهم ... الغرض من اللك الكتير اللى فوق ده
.. أصبح الأعلام فيلم كوميدى فى بعض القنوات ترجيدى فى الأخرى .. وكذلك حال البلد
.. انها الكوميديا الحزينة يا حضرات !
محتار تتفرج على ايه ؟؟ متتفرجش .. انزل
الشارع وشوف النهضة اللى على حق .. عينك هى اللى حتوريك حال البلد .. مش القنوات !
مصطفى زكريا الشابي
ليست هناك تعليقات:
إرسال تعليق