صورة قديمة
صورة قديمة لونها أصفر من الزمن ! .. صورة
قديمة بتخليك تحس بسعادة مُرّة .. بتضحك على شكلك وانت عيل واللبس اللى لبسهولك ..
بتضحك على ضحكتك البريئة العسولة .. بتضحك اما تشوف وجوة الناس اللى بتحبهم لسه زى
ما هى ، من غير تجاعيد او شعر أبيض ! .. بتضحك اما تفتكر ان كل مشاكلك تتلخص فى
انك عايز تلعب بحصانك الخشب بس جاركم
الرخم بيلعب بيه شوية ! .. بتضحك اما تفتكر الناس اللى مش فى الكدر .. وانك قدرت
تفتكرهم .. بتضحك اما تفتكر لحظة اما حد جابلك ايس كريم وفرحتك بيه ! بتضحك اما بتشوف
نفسك مش طايل غير رُكبت أمك وانك دلوقتى بقيت أطول منها ! بتضحك اما بتشوف أبوك
كان شايلك ودلوقتى بيقولك براحة .. انا مش قدك ! .. بس بتحزن اما تعرف ان كل ده بقى من الذكريات
ودلوقتى محبوس .. فى صورة !
لحظة بتمُر عليك وانت بتشوف صورك القديمة .. بتبقى
نفسك تعيط .. تعيط على أيام راحت مش راجعة .. على براءة أختفت وضحكة تلاشت ! بتحزن
اما تدرك ان فى حد فى الصورة مبقاش موجود وسطكم .. بتحزن اما تعرف ان الحصان الخشب
بتاعك شحتُه .. بتحزن اما تحس انك كبرت ! وأن الصورة حتتكرر بس مع أختلاف أدوار
اللى بيتصوروا .. بس بتضحك اما تعرف أن كل الحاجات دى لسه موجودة .. فى صورة !
جرب طلع صورك القديمة وأتفرج عليها .. شوف
كنت عامل ازاى ولابس ايه .. شوف كنت مع مين وبتعمل ايه .. افتكر ساعتها كنت بتضحك
ليه .. وأضحك ! افتكر ساعتها كنت بتعيط ليه .. وأضحك !
أوعى فى يوم متتصورش .. لازم تتصور .. ولو
صورة واحدة فى كل مرحلة عمرية .. فبرغم من التغيير اللى حيبقى فى شكلك ، إنما فى
حاجة واحدة مش حتتغير .. إن الذكريات بحلوّها ومرّها .. حتفضل أحسن من الواقع اللى
مسيرة يبقى بُكرة .. ذكرى !
مصطفى زكريا الشابي
ليست هناك تعليقات:
إرسال تعليق