الخيط الرفيع !

الخيط الرفيع !

ممكن أسأل سؤال ؟؟ ... هو ممكن يكون تقليدى اوى بس عايز أسئله .. ايه هو الغرور ؟؟! طب ايه الفرق بينه وبين الثقة فى النفس ؟؟ طب كمان حاجة .. عارفين الشعور اللى بيبقى موجود فى الشخص اما بيشوف واحد ناجح وبيقول "انا اللى أستحق أبقى كده" ممكن تسموها حقد او حسد براحتكم ... بس انا دايماً بحس ان فى شئ مشترك مابينهم .. مش عارف ايه ؟ تعالوا نحلل الموضوع مع بعض نقطة نقطة يمكن نكتشف :

الثقة فى النفس حسب وكيبديا "هى حسن أعتماد المرء على نفسه واعتباره لذاته وقدراته حسب الظرف الذى هو فيه دون افراط او تفريط"

يعنى بالعربى بقى .. "هو شعورك بالطمأنينة لأفعالك وعدم الخوف من رد الفعل وان يكون الشخص واثق انه بارع فى مواهبه بقدر المعقول"

تمام .. يبقى هى دى الثقة فى النفس .. انى ابقى متطمن وانا بتكلم مع الناس ومش خايف من رد فعلهم و ابقى عارف انى بارع فى الموهبة بتاعتى والشخص ده غالباً بيفيد ناس كتير.

طيب ايه هو الغرور ؟؟ من غير وكيبديا هو نفس الكلام اللى فوق بس مع "أفراط" .. يعنى بالبلدى .. انى ابقى شايف نفسى احسن واحد بعمل الشئ الفلانى ومفيش حد فى الدنيا بيعرف يعملوا زيى وده بيقى فى معظم الأوقات مش مؤذى .. بس لو حصل وأذى حاجة .. فبيئذى الفريق اللى بيشتغل معاه.

اما الحاجة التالتة هى الحقد ... من وجه نظرى هو عدم قدرتك على الوصول اللى هدف معين غيرك وصل له .. فبتقوم انت بتحقد عليه عشان انت شايف انك أحسن منه و تستحق عنه .. أما نجى نبص على النوع الأخير فهو واخد كتيير اوى من الغرور وبيأخد كتير اوى من الثقة فى النفس لو حبيت تأذى شخص ، والنوع ده اكتر نوع مؤذى فى الحياة .. لانه بدوره مش عايز ياخد مكانك بس .. لا ده عايزك تدمر وتنتهى .

اللى انا عايز اقوله ان فى خيط رفيع اوى بين الغرور والثقة فى النفس ، خليك دايماً متواضع عشان تبعد عن الغرور ، وخليك دايماً راضى عشان ماتكونش حقود ، وأعمل اللى عليك وأشتغل وأجتهد عشان تكون ناجح .. فى فرق مابين أتنين عندهم نفس الموهبة .. واحد نمها وأشتغل عليها والتانى كان بيتفاخر انه موهوب وخلاص .

                                                           مصطفى زكريا الشابي